ರೂಪಾಯಿ

ರೂಪವು ಹಲವು ಬಣ್ಣವು ಹಲವು

ಹೆಸರದು ಒಂದೇ ರೂಪಾಯಿ..

ಗಳಿಸುವ ಕೈಗಳ ಬಣ್ಣವು ಹಲವು

ಬೆಲೆಯದು ಒಂದೇ ರೂಪಾಯಿ..

ದುಡಿಯುವ ಕಪ್ಪನೆ ಕೈಗಳ ಸೇರಿ

ಹೊಳೆವುದು ಬೆಳ್ಳನೆ ರೂಪಾಯಿ..

ಐಶಾರಾಮಿಯ ಜಗಮಗದಲ್ಲಿ

ಕಾಣದು ಕಪ್ಪನೆ ರೂಪಾಯಿ..

ತುತ್ತಿಗೆ - ತೊಟ್ಟಿಗೆ, ಹೊರಯಲು ಹೊಟ್ಟೆಗೆ

ಇಂಧನ, ಈ ಧನ ರೂಪಾಯಿ..

ಜುಟ್ಟಿಗೆ ಬಟ್ಟೆಗೆ, ತೋರಿಕೆ ಲೊಟ್ಟೆಗೆ

ಓಡುವ ಕುದುರೆಯು ರೂಪಾಯಿ..

ಉಳ್ಳವರೆಡೆಗೆ ಬೆಚ್ಚೆನೆ ಮನೆಗೆ

ಸೇರುವ ಚೆಂಚೆಲೆ ರೂಪಾಯಿ..

ಹಸಿದರೆ ನೆಲವನು, ದಣಿದರೆ ಮುಗಿಲನು

ನೋಡೋರ ಮರೆವಳು ರೂಪಾಯಿ..

ಅರಿವಿನ ಕಣ್ಣನು ಮುಚ್ಚಿಸಬಲ್ಲದು

ಮಾಯದ ಮಗಳು ಈ ರೂಪಾಯಿ..

ಬಡತನದ ಆ ತಣ್ಣನೆ ಕನಸಲಿ

ಗಿರ ಗಿರ ತಿರುಗುವಳೀ ರೂಪಾಯಿ..